Француските власти во Нова Каледонија ја вратија целосната контрола врз главниот град на таа територија на Пацификот, изјави денеска францускиот министер за внатрешни и прекуокеански работи.
Таму две недели траеја немирите, во кои загинаа седум лица, а беа предизвикани големи штети во тој дел од архипелагот, каде со децении владее тензија меѓу поддржувачите на независноста и оние кои и се лојални на Франција.
Министерот Жералд Дарманен денеска на мрежата Икс изјави дека успешно е спроведена голема полициска операција во населбата Ривиер Сале, последниот дел од главниот град Нумеа кој беше под контрола на демонстрантите.
Тој рече дека 400 членови на безбедносните сили на Нова Каледонија учествувале во операциите, вклучително и членови на елитната француска полиција за антитероризам и организиран криминал и слични единици на француската војска.
Во акцијата беа уапсени 12 лица и отстранети се 26 улични барикади на противниците на француската колонијална власт.
Насилството избувна на 13 мај како одговор на обидот на владата на францускиот претседател Емануел Макрон да го измени Уставот и да ги промени списоците за гласање во Нова Каледонија. Франција прогласи вонредна состојба на територијата на Пацификот на 15 мај и испрати стотици воени засилувања за да и помогнат на полицијата да ги смири немирите, кои вклучуваа пукотници, престрелки, грабежи и палење згради.
Двете страни од конфликтот во Нова Каледонија – домородните Канаци кои сакаат независност и новодојденците лојални на Франција – подигнаа барикади или за да се побунат против властите или за да ги заштитат своите домови и имот.
Сепаратистичките демонстранти направија барикади од изгорени автомобили и други делови и направија делови од главниот град Нумеа во непристапни зони.
Францускиот претседател Емануел Макрон во понеделникот одлучи да ја укине вонредната состојба во Нова Каледонија со цел полесно да се смири ситуацијата и да води дијалог меѓу спротивставените страни и француските власти во врска со иднината на 270.000 жители на тој архипелаг. .
Партиите за независност и лидерите на Канак го повикаа Макрон да го повлече нацрт-законот за изборни реформи доколку сака да стави крај на кризата.
Противниците стравуваат дека изборниот закон ќе игра во рацете на про-француските политичари во Нова Каледонија и дополнително ќе го маргинализира домородниот народ Канак, кој долго време води кампања за ослободување од француската власт во услови на огромни економски разлики и децениска дискриминација.
Иако насилството се смири во последните денови, тензијата е висока и лидерите за независност ги повикаа поддржувачите да останат мобилизирани и да го задржат отпорот кон Франција.
Иако вонредната состојба е укината, полицискиот час се уште е на сила во вечерните часови и во текот на ноќта, а на сила е забраната за јавни собири, транспорт и носење оружје и продажба на алкохол.
Главниот меѓународен аеродром Ла Тонтута ќе остане затворен, како и училиштата.
Нова Каледонија стана француска колонија во 1853 година под царот Наполеон III, а по Втората светска војна беше прогласена за „прекуморска територија“ на Франција, а сите припадници на домородниот народ Канак добија француско државјанство во 1957 година.
