Украинскиот министер за одбрана Олексеј Резников, кој денеска пристигна во Вилнус на самитот на НАТО, пред малку на Твитер објави дека официјално е формирана коалиција за обука на украински пилоти на западни борбени авиони Ф-16.
„Официјално е, формирана е коалиција за обука на пилоти на украинските воздухопловни сили на авиони Ф-16! Денеска 11 земји партнери и Украина потпишаа меморандум со кој се дефинираат условите за обука“, објави Резников.
„Посебно сум им благодарен на Данска и Холандија за нивното извонредно лидерство во овој процес. Во програмата за обука ќе учествуваат украински пилоти, техничари и друг персонал. Исто така, постои можност во програмата да учествуваат и други видови авиони. Коалицијата е подготвенa да разгледа и други начини за овозможување на способноста на целосно функционални Ф-16“, пишува Резников.
Во Вилнус денеска слета и украинскиот претседател Володимир Зеленски со неговата сопруга Олена, а пред да појде Зеленски на Твитер напиша дека е апсурдно што нема одлука за членство на Украина на самитот. На гневната објава на Зеленски реагираше Белата куќа. Џон Кирби, советникот за национална безбедност на американскиот претседател Џо Бајден, денеска изјави дека Украина треба да работи на уште неколку услови за членството, како што се „доброто владеење, владеењето на правото, политички реформите – на кои Украина треба да работи, и ние разбираме дека е тешко да се работи на некои од тие реформи кога сте во војна“.
Во Киев денеска се огласија сирените за воздушен напад веднаш по почетокот на самитот на НАТО. Властите ги предупредија луѓето веднаш да одат во засолништата во 15 часот по локално време.
