Аргентина стана светски првак во Катар откако во финалето ја совлада Франција по подоброто изведување на пенали на турнирот кој за првпат се организираше во зимскиот период.
Иако тоа беше турнир со многу критики, првиот човек на ФИФА, Џани Инфантино беше исклучително задоволен, а се чини дека има нови идеи.
Посебно му се допадна идејата за турнир во средината на сезоната, во зимските месеци, поради што почна се повеќе да размислува за нови промени и дојде до таква што на многумина нема да им се допадне…
„Дејли мејл“ пренесува дека на секои четири години можеме да заборавиме на Светското првенство, а тоа би можело да се игра почесто.
Тие ја пренесуваат информацијата дека Инфантино има идеја дека Светското првенство во иднина ќе се игра на секои три години бидејќи според ФИФА ќе биде далеку поисплатливо.
Не се можни промени за следните два турнира, односно нема стравувања дека турнирите закажани за 2026 и 2030 година ќе се променат, но многу е сигурно дека ФИФА во меѓувреме ќе направи фудбалска револуција. Тоа би значело дека турнирот закажан за 2034 година се игра една година порано, па дури и повторно се игра во зима.
Неофицијално, Инфантино оваа поддршка ја добил од земјите во Африка и Азија, додека претходно двете највлијателни организации – УЕФА и КОНМБЕБОЛ веќе биле против идејата на Арсен Венгер турнирот да се одржува на секои две години. Се чини дека ова на секои три би можело да биде компромисно решение.
