Земјите од ЕУ ѝ ги дадоа на Украина сето оружје што можат без да ја компромитираат сопствената одбрана, објави Политико, цитирајќи европски функционер. Киев се соочува со кратења и на испораките на оружје и на паричните инјекции бидејќи „се појавуваат пукнатини“ во поддршката од Западот, според медиумот.
– Не можеме да продолжиме да даваме од нашите сопствени залихи – изјавил европскиот извор, цитиран во понеделникот.
Тој вели дека во ЕУ можеби сè уште има силна политичка поддршка за Украина, но „дадовме сè што нема да ја загрози нашата сопствена безбедност“. Во посебен напис, Политико напиша и дека САД се загрижени за високата корупција во владата во Киев и дека тоа е причината за намалената поддршка.
Коментарот беше даден за Политико како дел од репортажата од минатонеделниот Меѓународен форум за одбрана на индустријата во Киев, за време на кој домаќините тргнаа во „офанзива насочена кон производителите на оружје“, како што е објаснето во извештајот.
По 18 месеци интензивна борба во индустриски размери, европските залихи снемуваат, иако се зголемува надежта дека земјите можат да соработуваат за да најдат повеќе решенија, рече претставник на администрацијата на Бајден.
Сепак, Политико пишува дека две европски компании-гиганти, производители на оружје, потврдиле дека ќе соработуваат со Украина за заеднички да произведуваат оружје. „Рајнметал“, германски гигант за оружје, рече дека ќе соработува со украинската државна компанија за оружје, „Укроборонпром“, за изградба на тенкови и оклопни возила.
Британската БАЕ, исто така, објави дека отвора канцеларија во Киев и бара производство на пиштоли од 105 мм во Украина.
Франција е една од земјите кои се потпираат на идејата за копродукција на оружје со Украина. Околу 20 француски деловни лидери го придружуваа министерот за вооружени сили, Себастиен Лекорну, во Киев, придружувајќи им се на претставници од преку 250 компании распространети низ САД, Европа и Азија.
Од друга страна, Германија планира да испрати своја бригада од 4.000 војници во Литванија распоредена на границата кон Русија и да произведува муниција во Естонија, информираше германскиот министер за одбрана Борис Писториус во интервју за естонската државна телевизија ЕРР.
Началникот на германската армија генерал Карстен Бројер предупреди дека војната во Украина може да ескалира и повика на зголемување на одбранбените способности на Германија и на НАТО.
фото: МИА
