Американската амбасада во главниот град на Украина Киев соопшти дека ќе биде затворена денеска откако добила „конкретни информации за потенцијален значаен воздушен напад“. Сирените за воздушен напад беа активирани неколку пати во градот во текот на ноќта.
Амбасадата им нареди на своите вработени да се евакуираат, а истовремено ги советуваше американските граѓани во Украина да бидат подготвени веднаш да заминат во случај на воздушно предупредување, се наведува на веб-страницата на амбасадата.
Сирените за воздушен напад беа активирани во Киев неколку пати во текот на ноќта и околу два и пол часа утрово. Звукот на беспилотни летала и противвоздушна одбрана можеше да се слушне низ главниот град, вклучувајќи го и центарот на градот, јавува тимот на Си-Ен-Ен од Киев.
Во Киев од почетокот на септември речиси секојдневно се случуваат напади, поради што жителите се принудени да се засолнат во објектите на метрото.
САД, како што јави Си-Ен-Ен, ја повикаа Русија да престане со својата „неодговорна реторика“ откако претседателот Владимир Путин одлучи да ја прецизира нуклеарната доктрина на руската армија, односно околностите во кои Москва може да користи такво оружје.
Меѓутоа, САД рекоа дека не гледаат индикации дека Русија се подготвува да употреби нуклеарно оружје во Украина.
Новата рунда на „нуклеарно штракање“ на Москва уследи по одлуката на САД да и дозволи на Украина да напаѓа цели длабоко во Русија со оружје од американско производство.
Украина го погоди рускиот вооружен арсенал со ракети АТАКМС, кои вчера првпат ги истрела преку граница, според двајца американски претставници, што е голема ескалација на конфликтот на 1.000. ден на војна.
Соединетите Американски Држави, исто така, одобрија испраќање противпешадиски мини во Украина за прв пат, според американски официјални претставници, во уште една голема промена на политиката. Групите за човекови права силно ја критикуваа употребата на ова оружје.
