Властите на Ерменија соопштија дека заплениле повеќе од еден тон кокаин вреден 250 милиони долари, што е една од најголемите заплени на дрога во историјата на таа мала земја на Кавказ.
Пратката од Еквадор била нарачана од ерменска компанија и била транспортирана преку Панама, Италија и Грузија, се наведува во соопштението на Националната служба за безбедност.
Отворена е истрага, соопшти ерменското обвинителство.
Ерменија била наменета и за 2,7 тони кокаин во вредност од 800 милиони евра, скриен меѓу бананите од Еквадор и неодамна запленет во Италија.
Шверцот со дрога е во пораст во Ерменија, земја со околу три милиони жители. Минатата година во Ерменија биле регистрирани 743 случаи на трговија со дрога, а во 2021 година имало 420.
Ова ненадејно зголемување изврши притисок врз ерменската влада. Во февруари, министерот за внатрешни работи Вахе Газарјан беше цел на критики од пратениците поради „експлозијата на трговија со дрога“.
Опозициската пратеничка Агнеса Хамојјан ја осуди „страшната статистика“ која покажува дека „државата не презема сериозни мерки“ за да се запре оваа трговија, во која, како што рече, се вмешани „високи функционери“.
