Електронската плочка што беше залепена на градите на Новак Ѓоковиќ во текот на натпреварот од второто коло на турнирот „Ролан Гарод“ привлече огромно внимание во јавноста.
Сите се прашуваа што е тоа малечко и округло налик чипче залепено на градите на најдобриот тенисер на светот, со оглед на тоа што Ноле се смета за човек кој не експериментира со своето тело, а и долго време одбиваше да биде вакциниран против ковид-19.
Но, сега конечно на сите им стана јасно. Станува збор за уред наречен „Taopatch“, а него го користат многубројни спортисти. Уредот е комбинација на најновата технологија, нуди светлосна терапија и акупунктура.
„Уредот содржи слоеви од нанокристали кои ја претвораат телесната топлина во импулси светлина. Произведената светлина се испраќа до одредени акупунктурни точки во телото, што го стимулира централниот нервен систем и му помага во процесот на комуникација со остатокот од телото. Резултатот се многу позитивни здравствени предности, од подобро, поприродно држење до подобар сон, фокус, спортски резултати, ублажување на болка и многу друго“, се наведува на официјалниот сајт на креаторот на овој уред.
„Taopatch“ станува сè попопуларен помеѓу спортистите, а со оглед на тоа дека Ѓоковиќ е секогаш заинтересиран за унапредување на својата игра, одлучил да го испроба овој уред.
– Кога бев дете, многу го сакав Ајронмен, па сега се обидувам да го имитирам. Знаете, мојот тим употребува неверојатно ефикасна нанотехнологија за да ми помогне да бидам што е можно подобар на теренот. Станува збор за најголемата тајна во мојата кариера. Да не беше тоа, не би седел тука со вас – се пошегувал Новак.
Постојат повеќе вакви уреди, а нивната цена се движи од 280 до 2.600 долари, додека на официјалниот сајт на „Taopatch“ се наведува дека во текот на претходните 7 години, повеќе од 1.800 медицински работници имале можност да го тестираат производот.
