Францускиот министер за внатрешни работи, Џералд Дарманин, сугерираше дека екстремно левичарски активисти стојат зад саботажата на брзиот железнички систем во земјата, во пресрет на церемонијата на отворањето на Олимпијадата, пишува британски Гардијан.
Четири дена по нападите, Џералд Дарманин рече дека истрагата за подметнувањето пожари „идентификувала одреден број профили кои можеле да го извршат тоа“.
Тој посочи дека извесните припадници на екстремната левица можеби биле охрабрени да го нападнат транспортниот систем од неименувани други, опишувајќи го нападот како „многу прецизен и исклучително добро насочен“.
Тој не даде никакви докази околу своето тврдење за идентитетот на сторителите.
– Ова е традиционалниот начин на дејствување на крајната левица. Мора да бидеме внимателни, прашање е дали биле изманипулирани или тоа е за нивна корист. Има луѓе кои можат да му пристапат на ова движење – изјави Дарманин за ТВ каналот Франс 2.
Министеротво понеделникот го потврди и апсењето на „околу 50 лица“ кои „очигледно, со други лица, се проценува дека се 150, сакале да извршат саботажа или радикални протести во Париз за време на првите настани на Олимпијадата“.
Во раните утрински часови во петокот, подметнувачите на пожари изгореа оптички кабли на инсталации долж брзите железнички линии што го поврзуваат Париз со западниот, северниот и со источниот дел на земјата.
Тоа доведе до сериозни прекини низ целата земја и откажување на железничките услуги, иако секретарот за транспорт, Патрис Вергриете, рече дека сите возови на француската брза железничка мрежа во понеделникот сообраќаат нормално.
Вергриете рече дека цената на нападите „многу веројатно“ ќе изнесува милиони евра и дека се вложени значителни ресурси за зајакнување на надзорот на 5.000 милји (8.000 километри) од брзата железничка мрежа.
