Најмалку осум лица загинаа, а 28 се повредени во напад на плажа во главниот град на Сомалија, Могадишу, соопшти директорот на итната служба во тој африкански град.
Одговорноста за нападот ја презеде терористичката група Ал Шабаб, поврзана со Ал Каеда, пренесе АП.
Докторот Абдикадир Абдирахман изјави за Ројтерс дека службите за итни случаи регистрирале осум мртви и 28 повредени, но тој број „сигурно ќе се зголеми“ бидејќи и други луѓе ги превезувале жртвите.
Според изјавите на очевидците и локалните власти, се слушнала експлозија и истрели, а очевидецот Моамуд Моалим за АП изјавил дека го видел напаѓачот опкружен со експлозив неколку моменти пред да се разнесе во близина на хотелот, на популарната плажа Лидо.
Сомалиската новинска агенција објави дека безбедносните сили ги „неутрализирале напаѓачите“.
Плажата Лидо беше цел на терористите на Ал Шабаб и во претходните години. Минатата година девет лица беа убиени во нивниот напад на тоа популарно место меѓу населението во Могадишу.
