Еден од браќата осомничени за убиствата на 10 лица во канадската провинција Саскачеван е пронајден мртов, соопшти локалната полиција. Телото на Демиен Сандерсон (31) е пронајдено во староседелската заедница Џејмс Смит Кри. Неговиот брат и второосомничен, Мајлс Сандерсон, е во бегство. Еден од полицајците рекол дека раните не се самонанесени, јавува Би-Би-Си.
Демиен и Мајлс оделе од врата до врата и боделе луѓе во маалото, според зборовите на новинарот Логан Стајн кој даде изјави за Би-Би-Си. Во масакрот кој се случил во неделата, најмалку десет луѓе беа убиени, а 18 се ранети. Мотивот за нападите не е познат.
Сега потрагата е по другиот брат, Мајлс.
„Братот на Сандерсон е на слобода и опасен“, соопшти полицијата.
Во понеделникот вечерта, шефот Боби Камерон од Федерацијата на суверени домородни нации, која ги претставува сите 74 Први нации на Саскачеван, ги повика жителите да известуваат со какви било информации за нападите, во кои исто така беа ранети 18 лица.
– Некој таму знае нешто. Ве молиме да излезете за доброто на семејствата – рече тој.
Во Реџина, главниот град на покраината, во понеделникот вечерта немаше очигледни знаци на полициска потера. Градот беше главно тивок додека семејствата се собираа да уживаат во празникот Денот на трудот, неофицијалниот крај на летото.
Честопати, таа смиреност беше прекинувана со продорни сигнали што ѕвонеа на мобилните телефони, предупредувајќи на двајца возрасни осомничени мажи, а потоа само еден, кој сè уште е во бегство.
– Секогаш кога се емитува ново предупредување… семејствата го задржуваат здивот од страв од нови жртви или повреди – рече Камерон.
Мајлс е во бегство. Тој претходно ѝ бил познат на полицијата, се опишува дека има „обемно и долго криминално досие“ кое датира од пред неколку години за злосторства против поединци и имот.
