Шпанската полиција уапси пет лица, обвинети дека измамиле две жени за сума од 325.000 евра (271.000 фунти), претставувајќи се како холивудската ѕвезда Бред Пит на интернет, објави британски Гардијан.
„Осомничените стапиле во контакт со жените на веб-страница за обожавателите на оскаровецот и ги навеле да веруваат дека имаат сентиментална врска со него“, соопшти шпанската цивилна полиција „Гардија“ во понеделникот.
Претставувајќи се како Пит, членовите на бандата потоа наводно ги охрабрувале жените да инвестираат во различни проекти кои не постоеле.
Една жена, од јужниот регион Андалузија, била измамена за 175.000 евра, додека, пак, другата, од северниот дел на Баскија, изгубила 150.000 евра.
„Сајбер-криминалците, за да ги фатат жртвите, ги проучувале нивните социјални мрежи и им направиле психолошки профил, со што откриле дека двете жени се ранливи, не добивале нежност и биле во состојба на депресија“, соопшти полицијата.
Тие, исто така, користеле платформи за инстант пораки и комуницирале преку е-пошта со двете жени додека жените не стигнале до точка да веруваат дека разговараат преку Вотсап со самиот Бред Пит кој „им ветил романтична врска и заедничка иднина“.
Полицијата уапсила пет лица во јужниот регион на Андалузија, вклучувајќи ги и осомничените водачи на групата.
Тие упаднале во 5 домови како дел од нивните операции, при што одзеле неколку мобилни телефони, банкарски картички, 2 компјутера и дневник „во кој се запишани фразите што измамниците ги користеле за да ги измамат своите жртви“.
Службениците успеале да повратат 85.000 евра кои биле одземени од двете жени.
