Американските и британските сили нападнаа цели поврзани со Хутите во Јемен во четвртокот. Ова е петта заедничка операција од јануари против групата поддржана од Иран која изведува напади врз бродови во Црвеното Море и Аденскиот Залив, соопшти британското Министерство за одбрана. Во нападите две лица го загубија животот, а десет се повредени.
Според британското Министерство за одбрана, разузнавачките служби потврдиле дека Хутите извршувале напади врз меѓународни трговски бродови од две локации во близина на јеменското пристаниште Худајда. На локациите имало капацитети за контрола на беспилотни летала и складирање на дронови на долг дострел. Се вели дека Хутите исто така чуваат оружје земја-воздух на локациите, пренесува германската новинска агенција dpa.
Нападите на споменатите локации коалициските сили ги извршиле со авиони и бомби. Според јеменската телевизија Ал Масира, во нападите две лица го загубиле животот, а десет се повредени. Британското Министерство за одбрана соопшти дека петтиот заеднички напад со американските сили бил внимателно планиран за да се минимизира ризикот за цивилите или за невоената инфраструктура во Јемен.
Во меѓувреме, Централната команда на американската армија (Центком) објави дека нападнале вкупно 13 цели, а дека нападите биле неопходни за заштита на нивните сили, обезбедување слободна пловидба и безбедност во меѓународните води, пренесува француската новинска агенција АФП.
Иранската гарда го потврди снабдувањето со оружје на Хутите
Заедничките напади на британските и американските сили врз цели на Хутите започнаа на 12 јануари, откако бунтовничкото движење Хути дојде во првите редови на меѓународното внимание поради зголемените напади врз бродови во Црвеното Море.
Тврдат дека ги напаѓаат бродовите во знак на солидарност со Палестинците во Газа. Во средата, корпусот на иранската револуционерна гарда (ИРГЦ), влијателен огранок на иранската војска, за прв пат го потврди снабдувањето со оружје на Хутите во Јемен.
