Двајца малолетници со електрични тротинети настраа вчера на две локации, во Тетово и селото Врапчиште, гостиварско. Во првата несреќа малолетникот на тротинет бил удрен од моторно возило, а во вториот случај малолетникот изгубил контрола и паднал на коловозот. И двајцата малолетници се пренесени во болница со тешки телесни повреди.
„На 16.09.2023 во 15.55 часот било пријавено дека во Тетово на бул.„Илинденска“, се случила сообраќајна несреќа во која учествувале патничко моторно возило „мерцедес“ со тетовски регистарски ознаки, управувано од А.М.(47) од Тетово и електричен тротинет управуван од малолетник од с.Гургурница, тетовско. По несреќата, малолетникот бил пренесен во Клиничка болница Тетово, каде од лекар му биле констатирани тешки телесни повреди. Увид на местото на настанот извршила увидна екипа од СВР Тетово.
На 16.09.2023 во 15.20 часот е пријавено дека на регионалниот пат Р1-206 во с.Врапчиште, гостиварско, малолетник од с.Врапчиште управувајќи електричен тротинет изгубил контрола и паднал на коловозот. По несреќата малолетникот е пренесен во Медицински центар Гостивар каде од лекар му се констатирани тешки телесни повреди. Увид на местото на настанот извршила екипа од Полициска станица Гостивар“ – стои во известувањето од МВР.
