Индустриското производство во март годинава во однос на март лани е намалено за 10,4%, а за 3,1% споредено по квартали, објави денеска Државниот завод за статистика.
Гледано по сектори, индустриското производство во секторот „рударство и вадење на камен“ во март 2024 година, во однос на март 2023 година, бележи пораст од 1,9%, а опаѓање има во „преработувачка индустрија“ за 7,6% и во секторот „снабдување со електрична енергија, гас, пареа и климатизација“ за 38,6%.
Намалување на производството има во 10 преработувачки гранки: прехранбената индустрија, тутунската, текстилната, во индустријата за производство на хартија и производи од хартија, печатење и продукција на снимени медиуми (записи), потоа во индустријата за хемикалии и хемиски производи, производството на основни фармацевтски производи и фармацевтски препарати, металната индустрија и индустријата за производство на моторни возила, приколки и полуприколки.
Според главните индустриски групи, производството во март 2024 година, во однос на март 2023 година, бележи опаѓање кај енергија за 34,9%, интермедијарни производи, освен енергија за 3,4%, капитални производи за 5% и нетрајни производи за широка потрошувачка за 12,8%, додека пораст бележи кај трајни производи за широка потрошувачка за 3,5%.
