Поранешниот американски претседател Доналд Трамп во средата одби да одговори на прашања како дел од истрагата во Њујорк за деловните практики на неговото семејство, јавува Би-Би-Си.
Трамп во средата пристигна на сослушување во канцеларијата на државниот обвинител на Њујорк, Летиција Џејмс.
Владини претставници ја обвинуваат компанијата на Трамп дека добива даночни олеснувања и заеми благодарение на лажни или погрешни проценки на имотот.
Трамп ги отфрла обвинувањата и ја смета истрагата за лов на вештерки.
„Потрошени се години работа и десетици милиони долари на оваа долготрајна сага и сето тоа залудно“, рече тој во изјавата. „Одбив да одговорам на прашањата во согласност со правата и привилегиите на секој граѓанин според Уставот на САД.
Неколку дена претходно, ФБИ изврши рација во неговиот имот на Флорида во Мар-а-Лаго, како дел од посебна истрага за неговото ракување со доверливи документи.
Истрагата на државниот обвинител на Њујорк е граѓанска, додека паралелна истрага од страна на окружниот обвинител на Менхетен може да резултира со кривични пријави.
Правните експерти рекоа дека Трамп можеби одбил да одговори на прашања бидејќи одговорите потенцијално би можеле да се користат во таа кривична истрага.
Тој се осврна на 5-тиот амандман на Уставот, кој дозволува осомничените да не мора да сведочат против себе во кривична истрага.
Обвинителството Џејмс соопшти дека неговото сведочење е меѓу последните чекори во истрагата.
На крајот од истрагата, обвинителот би можел да поднесе тужба против Трамп или неговата компанија и да побара од нив да платат парична казна.
