Директорот на Фондот за здравствено осигурување, Сашо Клековски, денеска го презентираше планот за намалување на долгот на јавните здравствени установи (ЈЗУ). Како што посочи Клековски, долгот на ЈЗУ во земјава изнесува 5 милијарди денари, а само на почетокот на годинава бил зголемен за 1 милијарда. Долг, рече тој, кој можеше да го загрози редовното работење на здравствените установи и да доведе до блокирање на сметките на некои здравствени установи.
Клековски, денеска пред премиерот Христијан Мицкоски кој беше во посета на Фондот, истакна дека благодарение на ребалансот на Буџетот, долгот ќе биде намален за 2 милијарди денари, со што ќе биде донесен на едно одржливо ниво.
– Разговаравме за тоа што имаме направено во првите 100 дена на Владата и на премиерот му го презентиравме планот за намалување на долговите на Јавно здравствените установи. Долгот на Јавно здравствените установи во земјава изнесува 5 милијарди денари, а само на почетокот на годината е зголемен за 1 милијарда. Овој долг можеше да го загрози редовното работење на здравствените установи, а во некои и до блокирање на сметките и на работата, па затоа развивме еден план за намалување на долговите… Го намалуваме долгот, благодарејќи на ребалансот и на нашата сопствена заштита, за 2 милијарди денари, го намалуваме долгот од 5 на 3 милијарди денари и со тоа долгот го донесуваме на едно одржливо ниво кое нема да биде закана за здравствените установи – рече Клековски.
Премиерот Мицкоски, пак, како врвен приоритет на Владата го посочи здравјето на граѓаните и рече дека Владата изготвува план за во текот на следната фискална година овој долг да биде намален уште повеќе.
– Правиме план како Влада, во периодот што следува, можеби, да речеме, во текот на следната фискална година, уште повеќе да го намалиме тој долг. А очекуваме и со домаќинско, вредно и посветено работење на новиот менаџмент во болниците и во здравствените установи низ државата, дел од тие долгови да бидат и по тој пат вратени назад. Јас можам да кажам дека како Влада, врвен приоритет ни е здравјето на граѓаните – рече Мицкоски.
