На азиските берзи цените на акциите во вторник паднаа шести ден по ред бидејќи инвеститорите стравуваат од агресивно зголемување на каматните стапки од страна на американската централна банка и бидејќи на Европа и се заканува рецесија поради енергетската криза.
Индексот на MSCI на азиско-пацифичките акции, без јапонските акции, околу 07:00 часот беше намален за 0,4 отсто.
Во исто време, индексот Никеи падна за 1,2 отсто на берзата во Токио, додека цените на акциите во Хонг Конг, Јужна Кореја и Австралија се лизнаа меѓу 0,5 и 1 отсто. Во Шангај, пак, тие благо се зголемија.
Азиските инвеститори беа разочарани од вчерашниот остар пад на Волстрит. Dow Jones се лизна за 1,91 отсто, додека S&P 500 потона за 2,14 отсто, а Nasdaq индексот 2,55 отсто.
Во последните недели пазарите беа поддржани од надежите на инвеститорите дека поради благиот пад на инфлацијата во САД од највисоките нивоа во повеќе од 40 години, американската централна банка во иднина ќе биде помалку агресивна во зголемувањето на каматните стапки.
ФЕД ги зголеми каматните стапки за 2,25 процентни поени од март, а се очекува да ги зголеми во септември. Прашање е, пак, дали ќе ги зголемат каматите за 0,50 или 0,75 процентни поени.
Затоа, со нетрпение се очекува говорот на претседателот на ФЕД Џером Пауел во петокот во Џексон Хол.
„Пауел веројатно ќе дејствува агресивно за да ги намали инфлациските очекувања, така што тоа би можело да има негативно влијание на пазарот“, предупредува Џеј Хетфилд, директор во Инфраструктурен капитал менаџмент.
Затегнувањето на монетарната политика дополнително ќе го забави растот на економијата, која и онака технички е во рецесија, имајќи предвид дека економијата паѓа два квартали по ред на квартална основа.
Пазарите се под притисок и поради стравувањата од рецесија во Европа, која се бори со енергетската криза.
Вчера цената на гасот во Европа скокна за 13 отсто, достигнувајќи рекордни нивоа, откако руски Газпром објави дека гасоводот Северен тек 1 ќе биде затворен на три дена, од 31 август до 2 септември, поради „одржување“.
„Лошата енергетска ситуација во Европа сугерира дека инфлацијата сè уште не го достигнала својот врв, така што постои ризик инфлацијата да опстојува долго време доколку централната банка не преземе агресивни потези. Не е ни чудо што курсот на доларот во однос на еврото и британската фунта се движи на највисоките нивоа во последните децении“, вели Тапас Стрикланд, директор на НАБ.
Доларот зајакна, цената на нафтата падна
А на валутниот пазар вредноста на доларот во однос на кошничката на валути дополнително се зголеми и се приближи на највисокото ниво во последните 20 години, бидејќи се очекуваат натамошни агресивни каматни стапки од страна на ФЕД.
Индексот на доларот кој ја покажува вредноста на американскиот долар во однос на другите шест најважни светски валути се движи околу 108,90 поени, додека вчера во ова време изнесуваше 108,23 поени.
Истовремено, курсот на доларот во однос на јапонската валута е стабилен околу 137,40 јени, колку што беше и вчера во овој момент.
Сепак, американската валута зајакна во однос на европската, па цената на еврото се лизна на најниските нивоа во последните 20 години, под нивото од еден долар. Курсот на еврото во моментов е околу 0,9940 долари, додека вчера во овој момент изнесуваше 1,0027 долари.
Притисокот врз еврото е последица на стравувањата на инвеститорите дека економијата на еврозоната ќе западне во рецесија поради енергетската криза, додека Европската централна банка треба повторно да ги зголеми каматните стапки поради високата рецесија.
Цените на нафтата, од друга страна, пораснаа откако Саудиска Арабија предупреди дека ОПЕК може да го намали производството доколку побарувачката за нафта падне поради слабите економии и цените продолжат да паѓаат.
Цената на барелот на лондонскиот пазар се зголеми за 0,83 отсто, на 97,25 долари, додека на американскиот пазар цената на барелот порасна за 0,85 отсто, на 91,15 долари.
