Дури 36 српски воени авиони од типот МиГ-29 ќе бидат испратени во Франција, кои потоа ќе завршат во Украина, а ова е дел од договорот кој Србија го потпиша со Франција за да купи 12 француски авиони „Рафал“, тврди поранешната заменичка на претседателот на руската Дума, Елена Владимировна Панина на „Телеграм“, пренесува Нова.
„Борците ќе им бидат предадени на Французите во декември. Очигледно е дека тие авиони потоа ќе одат во Украина. Наводно, Москва веќе е информирана за оваа точка од договорот“, напиша Елена Владимировна Панина на „Телеграм“ додавајќи дека Белград нема дозвола од Москва за ваквата спогодба.
Според јавно достапните податоци, Србија има во активна служба 14 ловци МиГ-29, но не е познато колку неактивни авиони МиГ-29 има Србија во своите складишта.
„Ова не е првпат српско оружје да биде доставено во Киев. Украина преку посредник добила муниција од Србија во вредност од 800 милиони евра. Се поставува прашањето на кој од ‘браќата’ Русија може да го продаде своето оружје без ризик дека подоцна ќе пукаат во нас“, рече рускиот политичар.
Србија ќе купи 12 француски „Рафали“ за 2,7 милијарди евра.
Српскиот премиер Милош Вучевиќ на панелот на Бледскиот стратешки форум во Словенија рече дека Србија го почитува територијалниот интегритет и суверенитет на Украина и додаде дека Белград не крие ништо поврзано со односите со Кина и Русија и дека има право на најдобар начин да ги штити националните интереси.
– Украинците се словенски браќа на Србите, а Белград гласаше за сите резолуции во Обединетите нации на тема украински територијален интегритет и суверенитет – изјави денеска премиерот на Србија.
