Додека дел од Европа се „гуши“ во поплави, беснее пожар во Португалија. Најмалку седум лица, меѓу кои тројца пожарникари, загинаа во шумските пожари кои сè уште беснеат во Португалија, јавуваат локалните агенции. Делови од земјата горат од викендот, а температурите во некои области надминуваат и 30 степени. Најпогодени се северните и централните делови на земјата.
Пожарникарите – две жени и еден маж – загинаа при гаснење на пожар во Табуа во Коимбра, централна Португалија, објави управата за цивилна заштита на земјата.
Повеќе од 5.000 пожарникари се бореа со пожарите, за кои португалскиот премиер Луис Монтенегро рече дека „беснеат низ целата земја“.
Веќе изгореа десет илјади хектари меѓу Порто и Авеиро на север, објави во понеделникот португалската новинска агенција Луса.
Андре Фернандеш, национален командант за цивилна заштита на Португалија, рече дека имало 65 активни пожари до 13:00 часот по локално време.
Локалните медиуми објавија и дека болниците во погодените области примиле луѓе со изгореници, отежнато дишење и други повреди од пожарот. Најмалку 12 пожарникари се повредени, од кои двајца потешко, јавуваат медиумите.
Полицијата ги затвори автопатите, вклучително и главниот пат меѓу главниот град Лисабон и Порто, а десетици куќи беа уништени од пожар. Многу училишта во Гондомар, област во близина на центарот на Порто, беа затворени во вторникот, рече градоначалникот.
Сателитските и воздушните снимки го покажуваат степенот на катастрофата
На социјалните мрежи се шират фотографии и видеа од терен, како и сателитски снимки кои ја покажуваат реалната состојба и борбата на пожарникарите и локалните жители со огнената стихија.
Португалската управа за цивилна заштита ги именуваше тројцата пожарникари кои загинаа како Соња Клаудија Мело, Пауло Хорхе Сантос и Сузана Кристина Карваљо.
Португалскиот претседател, Марсело Ребело де Соуса, изјави надвор дека е „длабоко тажен“ поради смртните случаи.
Фернандеш рече дека возилото се запалило, но не е јасно дали претходно се урнало, пренесува агенцијата АП.
Во инцидентот се повредени уште двајца пожарникари, додаде тој.
ЕУ соопшти дека ќе испрати осум противпожарни авиони во Португалија за да помогнат во борбата против силните пожари.
Претседателката на Европската комисија Урсула фон дер Лајен рече дека блокот „итно се мобилизира“ и ги повика другите земји-членки да испратат дополнителна помош.
Властите, исто така, им се заблагодарија на Франција, Грција, Италија и Шпанија за нивната „брза и суштинска помош во борбата против ова зло“.
Португалија веќе има 30 бомбардери со вода – и има распоредено повеќе од 1.500 противпожарни возила – но властите рекоа дека сложената ситуација бара дополнителна поддршка.
Неколку пожари кои избувнаа во регионот Авеиро за време на викендот принудија околу 70 жители да избегаат, соопшти управата за цивилна заштита.
Ситуацијата не е надвор од контрола, но е многу сложена“, изјави Фернандеш.
Португалија и соседна Шпанија забележаа помалку шумски пожари оваа година, главно поради влажниот и дождлив почеток на годината. Но, тие остануваат ранливи на пожари поради топли и суви услови.
Климатските промени го зголемуваат ризикот од топло и суво време што веројатно ќе предизвика шумски пожари.
Светот веќе се загреа за околу 1,1 C од почетокот на индустриската ера, а температурите ќе продолжат да растат доколку не се направат брзи напори за намалување на емисиите на стакленички гасови.
