Претседателот на Собранието Талат Џафери им даде рок на политичките партии во Собранието до Нова Година да го договорат датумот за избори. По овој рок, Џафери рече дека ќе мора да постапи согласно уставните обврски и да ги распише изборите.
Тој денеска објасни дека како претседател на Собранието е должен да обезбеди доволно време за да се организираат изборите, кое што пропишуваат Уставот и законите.
Џафери ги повтори роковите, но и законската обврска за формирање на техничка Влада пред изборите.
Партиите од власта и опозицијата се поделени околу организацијата на изборите и датумот на нивното одржување. Власта сака одвоени изборни процеси, односно прво претседателски па неколку месеци подоцна и парламентарни избори, додека опозицијата, предводена од ВМРО-ДПМНЕ бара споен изборен процес, со објаснување дека така ќе се заштедат пари.
