Речиси 60 полицајци и навивачи се повредени во нередите во Софија пред фудбалскиот натпревар меѓу Бугарија и Унгарија во квалификациите за Европското првенство во 2024 година, соопштија бугарските власти.
Илјадници бугарски навивачи во четвртокот излегоа на улиците на Софија за да протестираат против начинот на кој се води Бугарскиот фудбалски сојуз, а протестот стана насилен.
Навивачите на неколку минути пред почетокот на натпреварот почнаа да фрлаат пиротехнички средства, камења и пластични шишиња кон полицијата. Откако биле запалени корпи за отпадоци, полицијата одговорила со водени топови. Властите изјавија дека се собрале 4.000 навивачи, а имало 1.500 полицајци.
„Изгледани се 24 повредени лица, меѓу кои седум се хоспитализирани поради повреди на главата, скршеници и иритации поради солзавец“, изјави за AFP портпаролката на градското одделение за итни случаи, Катија Сунгарска.
Полицијата пријавила 33 повредени полицајци меѓу кои и тешко повредените, изјави заменик началникот Стефан Иванов.
Уапсени се 33 навивачи, а се трага по други злосторници, рече Иванов, критикувајќи ги „невидените инциденти“ во таа балканска земја.
Бугарија и Унгарија одиграа нерешено 2:2, по што Унгарија се пласираше на Европското првенство во Германија во 2024 година.
Бугарија има освоено само три бода од седум натпревари и е последна во групата Г.
Бугарските власти минатата недела предупредија на висок ризик од нарушување на јавниот ред и мир внатре и надвор од стадионот, поради што беше одлучено натпреварот да се игра без публика.
Љубителите на фудбалот бараат оставка од претседателот на Фудбалскиот сојуз, Борислав Михаилов, кој на чело е 18 години.
Навивачите се лути поради лошите резултати на бугарската репрезентација која во последните две децении не се пласираше на големо натпреварување.
Последен пат Бугарија играше на ЕП во 2004 година во Португалија.
Михаилов поднесе оставка во 2019 година, по што ја повлече одлуката.
Тој беше реизбран за претседател на ФА во 2021 година, и покрај наводите за местење натпревари и скандал со расистичко однесување од навивачите на натпреварот против Англија во 2019 година.
