Илјадници граѓани на Приштина со денови протестираат поради силувањето на 11-годишно девојче во Косово. Злосторството се случило минатата сабота кога пет лица силувале 11-годишно девојче од Приштина. Косовските медиуми јавуваат дека девојчето било силувано од 17:30 до 00:30 часот во еден од градските паркови.
Демонстрантите бараат смртна казна за силувачите, од кои четворица се малолетни. Еден од осомничените за силување е 26-годишен маж, а приведени се и неговиот малолетен брат и уште три малолетници. Тие добија едномесечен притвор.
Протестите во Приштина беа организирани од невладини организации кои се занимаваат со заштита на жените во Косово. Една од организаторите, Трина Бинаку, рече дека силувањето на 11-годишното девојче било симбол на косовскиот „патријархален систем“.
Бинаку им рече на толпата дека протестите ќе продолжат се додека владата не воведе ефективни мерки за казнување на родовото насилство. Шефот на косовската полиција поднесе оставка поради, како што вели, професионалната совест во врска со овој случај.
Девојчето било силувано повеќе од една година
Косовскиот министер за внатрешни работи Џељаљ Свечла денеска соопшти дека првите информации покажуваат дека 11-годишното девојче било малтретирано многу подолго – повеќе од една година.
„Првите индиции или информации се дека оваа малолетничка е силувана повеќе од една година. Барањето го испратив директно до првиот човек на полицискиот инспекторат на Косово за да бидат повикани како сведоци сите инволвирани во овој случај и институциите на Косово и јавноста да бидат соодветно информирани за тоа што се случило и што направиле институциите. Но и што поскоро да излеземе со резултатот од овој исклучително тежок случај“, рече тој.
Тој додаде дека институциите не ја заштитиле жртвата, но изрази уверување дека сите пропусти ќе бидат идентификувани и одговорните ќе бидат казнети.
