Министрите за здравство на земјите членки на Европската унија на состанокот во Луксембург усвоија препорака со која бараат да се поттикне помала потрошувачка на антимикробни лекови, меѓу другото, намалување на потрошувачката на антибиотици за 20 отсто до 2030 година. .
„Не можеме да ги игнорираме смртоносните закани што микроорганизмите отпорни на лекови ги претставуваат за здравјето на луѓето. Борбата против антимикробната резистенција беше клучен приоритет на шведското претседателство, а денешната препорака им дава на земјите на ЕУ алатки за следење и намалување на потрошувачката на антимикробни средства“, рече Јакоб Форсмед, шведски министер за социјални работи и јавно здравје.
Здравјето е ексклузивна надлежност на земјите-членки, затоа Советот на ЕУ не може да донесува обврзувачки регулативи туку препораки кои земјите-членки можат да ги спроведуваат на доброволна основа.
Препораката е насочена кон превенција и контрола на инфекции, надзор и мониторинг, иновација и достапност на ефективни антимикробни средства, претпазлива употреба и соработка меѓу земјите-членки и на глобално ниво.
Во соработка со Европскиот центар за превенција и контрола на болести (ECDC), со препораката се утврдени неколку цели на ЕУ кои треба да се исполнат до 2030 година. Тоа се намалување на вкупната потрошувачка на антибиотици кај луѓето за 20 проценти, ефективна употреба на антибиотици за да најмалку 65 проценти од вкупната потрошувачка на антибиотици кај луѓето да бидат ефективни и да се намалат инфекциите со три клучни бактерии отпорни на антибиотици, што главно се однесува на болниците.
Антимикробните средства се лекови од критична важност. Меѓутоа, поради нивната прекумерна и неправилна употреба со текот на годините, антимикробната резистенција е зголемена, што значи дека антимикробните средства ја губат својата ефикасност, што го отежнува или оневозможува лекувањето на инфекциите.
