Како долгото полнење на телефонот, да речеме преку ноќ, влијае на квалитетот на батеријата? Дали е можно да се преполни батеријата?
Откако паметните телефони се напојуваат со литиум-јонски батерии, се води дебата за тоа дали долгорочното полнење, да речеме преку ноќ, го скратува животниот век на батеријата.
Според онлајн порталот Science Alert, животниот век на батеријата на телефонот го одредуваат многу фактори, меѓу кои клучни се староста на телефонот и таканаречената хемиска старост. Последново се однесува на постепеното влошување на батеријата поради температурни флуктуации, модели на полнење и празнење и општа употреба. Хемиското стареење со текот на времето го намалува капацитетот на полнење, траењето на батеријата и севкупните перформанси.
Студијата од 2019 година покажа дека батеријата на паметниот телефон може да издржи во просек 850 целосни циклуси (полнење/празнење) пред нејзиниот капацитет да падне под 80 проценти. Тоа значи дека почетниот капацитет паѓа под 80 проценти по околу две до три години, по што батеријата почнува значително побрзо да се троши.
Што ѝ прави на батеријата полнењето преку ноќ?
На повеќето паметни телефони од новата генерација им требаат 30 минути до два часа за целосно полнење.
Полнењето на телефонот преку ноќ не само што е непотребно, туку и го забрзува стареењето на батеријата, пишува Science Alert. Пред сè, треба да се избегнуваат целосни циклуси на полнење, односно целосно празнење (0%) и полнење до 100 проценти. Наместо целосно полнење, се препорачува батеријата да се наполни до 80 проценти и да не падне под 20 проценти.
Но, можно е да се преполни батеријата, барем теоретски. Ова може да предизвика прегревање на батеријата и да ги зголеми шансите за пожар. Повеќето модерни телефони имаат вградена заштита која спречува вакво нешто. Така, iPhone-ите имаат можност да го одложат полнењето над 80 проценти, додека телефоните Galaxy нудат можност за ограничување на полнењето до максимум 85 проценти.
Неколку начини да ја заштитите батеријата на телефонот:
Инсталирајте ги најновите софтверски ажурирања за да го одржувате телефонот во тек со подобрувањата на перформансите на батеријата на производителот.
Користете оригинални или сертифицирани полначи. Несертифицираните полначи може да го зголемат ризикот за безбедноста.
Не го изложувајте телефонот на високи температури. Повеќето телефони работат најдобро помеѓу 0 и 35℃.
Ограничете го полнењето на 80 проценти од целосниот капацитет и не дозволувајте да падне под 20 проценти.
Не полнете го телефонот подолго отколку што е потребно, како на пример преку ноќ, и исклучете го од изворот на енергија кога батеријата ќе достигне 100 проценти.
Кога се полни, чувајте го телефонот во добро проветрено место и не ставајте го под ќебе, перница или тело додека се полни.
Следете го статусот на батеријата и брзината на полнење/празнење.
Ако забележите дека вашиот телефон се прегрее или има испакнат грб, однесете го на сервис.
Следете ги упатствата на производителот во врска со одржувањето на телефонот и батеријата.
