Откако актуелниот американски претседател Џо Бајден пред три дена објави дека се повлекува од трката за нов мандат, се поизвесно е дека потпретседателката Камала Харис ќе биде кандидат на Демократската партија на претседателските избори во САД во ноември.
Анкетата на Ројтерс/Ипсос објавена вчера покажува дека Харис има тесно водство пред републиканецот Доналд Трамп во претседателската трка. Таа води пред Трамп со 44% наспроти 42% меѓу регистрираните гласачи во националната анкета спроведена во понеделникот и вторникот.
Уредникот на Newsweek, Том Роџерс, пишува дека Демократската партија всушност пропуштила одлична можност да предложи подобар кандидат, кој би имал уште поголеми шанси против Трамп. Тој вели дека бројни демократи му признале во приватни разговори во изминатите месеци дека не мислат дека Харис треба да стане нов претседател.
Роџерс наведе вкупно пет причини зошто, според него, Харис има послаби перспективи од некои други потенцијални кандидати на Демократската партија.
Прво, тој нагласува дека е јасно оти на владетелите ширум светот им е многу тешко да останат на функции во актуелната политичка клима. Како доказ го наведува фактот дека владејачките парти поминале многу лошо на изборите, од Обединетото Кралство, преку Франција, па сè до Индија. Тој е убеден дека гласачите ќе ја доживуваат Харис како дел од раководното тело, со оглед на тоа што таа беше потпретседателка во Белата куќа во изминатите 4 години.
Второ, Харис има 59 години, што значи дека нејзината возраст нема да биде доведена во прашање. Сепак, и републиканците и медиумите ќе се занимаваат со прашањето зошто луѓето од најтесното опкружување на Бајден ја прикривале неговата состојба, односно неспособноста да ги извршува адекватно своите должности. Нема начин Харис да го избегне тоа прашање.
Републиканскиот кандидат за потпретседател Џеј-Ди Венс веќе го повика Бајден да поднесе оставка од функцијата претседател. Тој праша како Бајден може да ја извршува функцијата кога и самиот призна дека не е способен да се кандидира за нов мандат. Затоа Харис ќе мора да објасни зошто не треба веднаш да ја преземе претседателската должност од Бајден.
Роџерс пишува дека републиканците навистина не би требало да сакаат Харис да го наследи претседателството бидејќи би добила шанса да се докаже како шефица на извршната власт и на тој начин да ја промени моменталната перцепција кај гласачите.
Трето, имиграцијата ќе биде наметната како едно од најважните прашања на кампањата и Харис нема да може таму да ја сокрие својата одговорност. Таа беше задолжена од Бајден да ги реши проблемите на границата, а повеќето граѓани сметаат дека тие не се решени.
Роџерс забележува дека не му е јасно зошто демократите номинирале личност која е толку ранлива за едно од клучните политички прашања. Најдобриот одговор што го имаат демократите за тоа е дека администрацијата на Бајден постигна законодавен компромис за имиграцијата со некои од најконзервативните републиканци, а потоа Трамп го раскина договорот.
Четврто, Роџерс не верува дека наративот „обвинителката наспроти криминалецот“ ќе им помогне на изгледите на Харис. Тој објаснува како претворањето на правосудната потера по Доналд Трамп во централна приказна на кампањата е целосно спротивно на идејата за „слепа правда“.
Присилувањето на таков наратив може да наведе многу гласачи да мислат дека прогонот на Трамп е политички мотивиран, наместо независен, непристрасен обид да се покаже дека никој не е над законот.
Петто, поради неговите ослабени комуникациски вештини, Бајден не можеше да ја убеди јавноста дека Трамп не треба да биде реизбран за претседател. Сепак, Роџерс предупредува дека дури ни Харис не е силен говорник кој може остро и јасно да ги артикулира аргументите против Трамп.
Камала Харис сепак, можеше да допре до некои гласачи кои Бајден не можеше да ги освои. Таа веќе е позиционирана како силен поборник за правото на избор на жените. Со оглед на тоа дека потекнува од мајка Индијка и татко црнец, таа смета и на гласовите на оние црнци кои биле незадоволни од економската политика на Бајден.
„Можеби Камала Харис може да го победи Доналд Трамп. Но, не разбирам зошто Демократската партија помина низ тешка вежба да го принуди актуелниот претседател да се повлече, само за да го круниса најслабиот од кандидатите за кои се зборуваше дека се потенцијални кандидати“ – заклучи Роџерс.
