Како што пишува „Харвард Хелт“, студија од 2018 година покажала дека децата кои редовно земаат антибиотици се изложени на поголем ризик од дебелеење од децата кои земаат помалку лекови. Спроведени се неколку студии за врската помеѓу антибиотиците и тежината.
Студијата на глувци од 2014 година покажа дека оние кои биле изложени на антибиотици добиваат многу поголема тежина од другите глувци кои се хранеле со истата диета. Друга студија од 2011 година докажа дека антибиотиците имаат значително влијание врз хормонот за глад во телото, наречен грелин.
Неколку стручњаци за порталот „Бирди“ објаснуваат дали има врска помеѓу земање антибиотици и дебелеење.
Антибиотиците влијаат на здравјето на цревата
Д-р Пат Салбер наведува дека антибиотиците имаат ефект врз бројни бактерии во човечкото црево.
„Знаеме дека овие бактерии, колективно познати како микробиом, имаат значителни ефекти врз енергетската хомеостаза и контролата на тежината“, вели д-р Салбер.
Таа додава дека се уште се расправа за ефектите на антибиотиците во однос на килограмите, односно зголемувањето на килограмите. Д-р Салбер наведува дека не постои едноставен одговор на прашањето дали антибиотиците влијаат на зголемувањето на телесната тежина.
„Се чини дека антибиотиците се најновите негативци во приказната за дебелината, но тие можеби не дејствуваат сами“, додава таа.
Антибиотиците може да предизвикаат прекумерен раст на лошите бактерии
Д-р Кристофер Калапаи наведува дека антибиотиците ја уништуваат дигестивната флора и доведуваат до бактериска нерамнотежа, што е една од најчестите причини за надуеност.
„Покрај тоа, антибиотиците може да предизвикаат промена во навиките на дебелото црево и апсорпција на храна и хранливи материи, што може да предизвика чувство на замор или слабост“, додава докторот.
Д-р Калапаи нагласува дека е важно да не се претера со употребата на антибиотици бидејќи може да ги оштети цревните бактерии, може да се оштетат митохондриите, што потоа влијае на вашата тежина бидејќи главната задача на митохондриите е да ја претворат храната во енергија, пренесува N1 Загреб.
„Антибиотиците исто така можат да го зголемат нивото на грелин во крвта, кој е моќен стимуланс на апетитот“, вели докторот.
Д-р Рошини Раџ, гастроентеролог вели дека антибиотиците убиваат и многу здрави, добри бактерии во цревата, кои можат да го исфрлат дигестивниот систем од рамнотежа и да овозможат прекумерен раст на лоши бактерии кои можат да предизвикаат зголемување на телесната тежина.
Лошите цревни бактерии можат да ја стимулираат желбата за храна, гладот и воспалението, а исто така може да ја зголемат количината на енергија што му е потребна на вашето тело за да ја вари храната, што потенцијално резултира со чувство на бавност и замор.
Д-р Раџ додава дека „поради недостаток на добри бактерии, може да бидете повеќе надуени и да имате неправилна столица“.
Антибиотици и пробиотици
Д-р Калапаи наведува дека антибиотиците можат да влијаат на природните организми во цревата, па може да предизвикаат габични инфекции кај некои луѓе.
Затоа е многу важно да се земаат пробиотици заедно со антибиотици, кои делуваат како балансирачки агенс за контрола на нормалната цревна флора.
Д-р Раџ се согласува, наведувајќи дека пробиотиците имаат голем број здравствени придобивки.
„Пробиотиците се поврзани со губење на тежината поради нивната способност да ги балансираат бактериите во цревата, да го подобрат варењето, да го намалат воспалението, што резултира со надуеност и да помогнат во подобра апсорпција на хранливите материи од храната“, објаснува д-р Раџ.
Тој додава дека пробиотиците се поврзуваат и со побрз метаболизам, па позитивно делуваат на имунитетот. Раџ известува дека некои луѓе изгубиле неколку килограми кога консумираат пробиотици за подобрување на варењето и целокупното здравје.
Се разбира, пред да донесете каква било одлука, дефинитивно треба да се консултирате со вашиот лекар.
„Ако антибиотиците се апсолутно неопходни, разговарајте со вашиот лекар за тоа како да одржувате добро дигестивно здравје за време и по третманот“, вели д-р Раџ.
