Испраќањето на детето во неговата соба кога е непослушно е еден од најстарите и најчестите методи на дисциплина, но дали функционира? Како што објаснуваат психолозите, овој метод на дисциплина прави повеќе штета отколку корист, а што е полошо е фактот што може да ги научи да ги потиснуваат своите емоции наместо да научат како да се справат со нив.
Имајќи предвид дека во денешно време сè помалку родители користат физичко казнување кога децата се однесуваат лошо, наредбите како нивно испраќање во соба станаа еден вид модерен „тајм-аут“. Основната идеја за испраќање на детето во неговата соба е да може да седи сам далеку од другите, да ги смирува своите емоции, но и внимателно да размислува за своите постапки, пренесува Index.hr.
Исто така, се смета за многу подобра опција од викањето или некои други видови казнување и им овозможува на родителите да се справат со тешка ситуација со конзистентен пристап, без всушност да мора директно да се соочат со какво било негативно или непријатно однесување кое нивното дете го покажало.
Сепак, психолозите нагласуваат дека овој метод на дисциплина не се препорачува, а еве зошто.
Тие тврдат дека, иако децата подоцна може да излезат помирни од собите, тие пропуштиле можност за развој. Имено, кога детето е луто или непослушно, причината за тоа најчесто е неговиот страв, повреда или беспомошност. Кога ќе го испратиме детето во соба да се смири, на тој начин всушност му испраќаме порака дека треба да ги потиснува емоциите додека не биде подготвен повторно да функционира „нормално“, додаваат тие.
