На вториот ден од официјалната посета на Австралија, британскиот крал Чарлс Трети се соочи со непријатност веднаш откако го заврши својот говор во австралискиот Парламент, бидејќи независната сенаторка Леа Торп почна да вика „Ова не е твоја земја. Ти не си мојот крал“.
Би-Би-Си јавува дека сенаторката Торп ја прекина церемонијата во Канбера извикувајќи една минута „Ти не си мој крал“, по што интервенирало обезбедувањето и ја одвело.
Кралот штотуку ја напушти говорницата за да и се придружи на кралицата Камила, која седеше на галеријата од парламентарната сала, кога сенаторката Торп почна да вика и да се приближува до говорницата од задниот дел на пленарната сала.
Откако изнесе обвинувања за геноцид врз „австралискиот народ“, можеше да се слушне како таа извикува: „Ова не е твоја земја, ти не си мој крал“.
Скај њуз објави дека Торп е првата Абориџинка од државата Викторија која станала сенатор, а кога положила заклетва во австралискиот парламент, одбила да се заколне на верност на тогашната британска кралица Елизабета Втора, мајка на Чарлс.
Церемонијата заврши без да се спомене инцидентот, а кралската двојка се упати кон излезот од зградата на парламентот за да се сретне со насобраните граѓани.
