Британскиот крал Чарлс Трети, како што е најавено, со работа го прославува својот 75-ти роденден и ќе ги истакне проектите кои долго време му биле важни, меѓу кои и помагањето на сиромашните. Неговите роденденски планови вклучуваат прием за болничари и акушерки во Националната здравствена служба (NHS), која исто така денеска го слави својот 75-ти роденден.
Денот ќе биде одбележан со церемонијален топовски истрел, вклучително и од Лондонската кула, јавува Би-Би-Си.
Во плановите на кралот за денеска е нагласена јавната служба, а не веселбите, но сепак се очекува да биде организирана приватна вечера за блиското семејство и пријателите.
Принцот Хари, војводата од Сасекс, кој живее со семејството во САД, нема да биде присутен, но, според сигурни извори, ќе му се јави на својот татко на телефон за да му честита.
Главниот дел од јавниот дел од роденденот на кралот ќе биде официјалното лансирање на проектот Coronation Food.
Проектот треба да го реши проблемот на зголемениот број луѓе кои не можат да платат за храна, а во исто време се фрлаат милиони тони вишок храна.
Истакнувајќи ја кампањата во една статија во списанието Big Issue, кралот Чарлс рече дека „потребата за храна е исто толку реален и итен проблем како и отпадот од храна“. Списанието им дава шанса на маргинализираните поединци да заработат со продажба на таа публикација на улица.
Кралот рече дека притисокот врз трошоците за живот резултира со „премногу семејства и поединци да не добиваат хранливи оброци“.
Според проектот, треба да се постават дистрибутивни центри за да се поврзат вишокот храна со пријавените 14 милиони луѓе кои се соочуваат со несигурност на храна.
Минатата недела, кралот ги преименуваше своите добротворни организации во Фонд на кралот и Фондација на кралот, наместо Фонд на принцот и Фондацијата на принцот.
Овој вторник ќе биде типичен за првите 14 месеци од владеењето на кралот, пренесува АП.
По седумдесетгодишното владеење на неговата мајка, кралицата Елизабета Втора, Чарлс сака да покаже дека монархијата останува важна во современото британско општество.
Тој направи три странски посети, вети дека ќе ги отвори кралските архиви за истражувачите кои ги испитуваат врските на круната со ропството и изрази „тага и жалење“ за „грозоморните и неоправдани акти на насилство“ извршени врз Кенијците за време на нивната борба за независност.
