100-годишен маж од јужниот бразилски град Бруске влезе во Гинисовата книга на рекорди за најдолг стаж во истата компанија – 84 години, пишува Ројтерс.
И покрај неговото необично достигнување, советот на Волтер Ортман до луѓето кои се стремат кон долг и задоволувачки професионален живот е изненадувачки рутински – правете го она што го сакате и избегнувајте нездрава храна.
– Мора да ви се допаѓа работата. Почнав да работам со таа желба и борбеност – изјави повозрасниот Бразилец.
– Не можете само да работите некоја работа и да тврдите дека работите. Тоа не помага. Нема да можете да издржите – додаде тој.
Според локалните медиуми, Ортман почнал да работи во фабриката на компанијата која сега се вика „RenauxView“ и се занимава со производство на ткаенини. Набргу потоа, тој преминал во администрацијата и на крајот станал менаџер за продажба.
За да го одржи своето тело и ум, тој секојдневно се протега и внимателно ја следи исхраната.
– Јас избегнувам сол и шеќер. Избегнувам работи кои му штетат на цревниот тракт. Избегнувам кока-кола и други газирани пијалаци. Користам само работи кои се добри за моето здравје. Тоа му помага на моето тело да остане силно засекогаш – вели Ортман.
