Капитенот на фудбалската репрезентација на Швајцарија, Гранит Џака, повторно е во центарот на вниманието пред претстојниот натпревар против Србија, кој ќе се одигра в сабота во Лесковац.
Неговиот постар брат Таулант, исто така фудбалер, дури го молеше Гранит да размисли дали треба да настапи на овој натпревар, свесен за тензиите што би можеле да се појават.
Гранит Џака и претходно бил во фокусот на контроверзии кога ја покажа симболиката на албанскиот орел при постигнување гол на Светското првенство во Русија во 2018 година. На Светското првенство во Катар во 2022, тој беше критикуван откако се фати за меѓуножјето и упати навреди кон клупата на српската репрезентација, поради што предизвика негативни реакции во Србија.
Неговиот брат Таулант Џака, албански репрезентативец, кој играше против Србија во 2014 година, го изрази своето мислење дека натпреварот ќе биде тежок за Гранит поради можните емоции и провокации. Тој изјави за швајцарскиот медиум „Blick” дека веднаш по жрепката му се јавил на Гранит и му предложил да го пропушти овој натпревар.
– Од прва рака знам колкав притисок и емоции се присутни на ваквите натпревари. Му предложив на Гранит да разговара со тренерот Мурат Јакин и можеби да не игра, но сите го знаеме – тој сака да настапи на секој натпревар за Швајцарија – изјави Таулант.
И покрај советот, Гранит Џака ќе биде дел од натпреварот, но неговиот брат го предупреди на важноста да остане смирен и да ги игнорира провокациите.
– Не е лесно да останеш под контрола 90 минути кога емоциите се толку силни, но Гранит мора да игра фудбал и да се фокусира на победата – додаде Таулант Џака.
Натпреварот меѓу Србија и Швајцарија ќе се одигра оваа сабота, а сите очи ќе бидат вперени во Гранит Џака и неговиот настап на теренот.
Albanian
English
Macedonian
Turkish
