Американскиот државен секретар Антони Блинкен рече дека преговарачите постигнале „добар напредок“ кон договорот што ќе доведе до прекин на огнот меѓу Израел и Хезболах во Либан.
Вашингтон работи „многу интензивно“ на финализирање на договорот што ќе вклучи повлекување на Хезболах од граничната област со Израел, рече Блинкен во четвртокот, според извештајот на АФП.
„Врз основа на мојата неодамнешна посета на регионот и тековната работа, постигнавме добар напредок кон тие договори. Имаме уште многу работа кон таа цел“, рече Блинкен, нагласувајќи ја важноста од „дипломатско решение кое ќе вклучува прекин на огнот“.
Тој, исто така, повика на „ефикасно спроведување“ на резолуцијата 1701 на Советот за безбедност на ОН, која повикува на разоружување на недржавните групи во Либан и целосно повлекување на израелските сили од земјата.
Американскиот секретар за одбрана Лојд Остин, кој зборуваше заедно со Блинкен, рече дека има „можност за напредок“ во Либан, додавајќи: „Се надеваме дека ќе видиме позитивни промени во Либан во блиска иднина“, пишува Гардијан.
