Американските сили би го бранеле Тајван, доколку Кина го нападне островот, изјави претседателот на САД, Џо Бајден.
Во интервју за Си-Би-Ес, на прашањето „дали Американците би го бранеле Тајван во случај на кинеска инвазија“, тој одговори „да, доколку би дошло до напад без преседан“.
Бајден нагласи и дека „не го охрабрува“ островот да прогласи формална независност.
– Тоа е нивна одлука – додаде американскиот претседател.
Како што пишуваат некои медиуми, Бајден ја даде изјавата во време кога има значително приближување на САД и Тајван, но и во период кога односите меѓу Пекинг и Вашингтон се на најниско ниво во изминатите неколку децении, пренесува Бета.
