Медиумите ширум светот дури отпосле дознаа за тоа на кој начин Џо Бајден вчера отпатува во Киев и ненадејно се појави на гости кај својот колега Володимир Зеленски. Американскиот претседател е една од најследените личности во САД, но овојпат морал да прави нешта нетипични за функцијата.
Во 2 часот по полноќ во воен хангар близу Вашингтон тој се качил на авион „Боинг 757“ со ознаката „Ц-32“ со спуштени капаци. Само двајца новинари биле во тимот во кој има разузнавачи и лекари. Се работи за новинарка и репортер од Волстрит Џурнал. Но, тие веднаш не го виделе Бајден. Им ги одзеле мобилните, и на тимот, и на Бајден, пишува Ројтерс.
По 7 часа стигнале во западна Германија, во познатата база Рамштајн од каде се раководи војната. Таму авионот полнел гориво, но капаците на прозорците останале спуштени. Никој не смеел да го напушти леталото. Потоа летале до аеродромот Жешов во Полска, а од таму со автомобил се упатиле кон железничката станица во пограничниот град Пржемишл. Се качиле во воз дури во 21 часот и 15 минути. За цело тоа време двајцата новинари сепак не можеле да пристапат до Бајден. Дури потоа го сликале во возот, а нивните авторски фотки се раширија по Твитер.
Повеќето од патниците во осумте вагони биле од осигурувањето. Во драматичниот опис се наведува и дека Бајден ги сака возовите и дека наводно како сенатор „со години“ патувал со воз од Делавер до Вашингтон, за што го добил прекарот „Амтрак Џо“.
Но, се истакнува, ниеден американски претседател не патувал 10 часа во воз во воена зона. Кога патувале во Авганистан или во Ирак, таму ги обезбедувале американски војници, коишто барем официјално ги нема во Украина.
Возот влегол во Киев во самите мугри. Бајден излегол од возот во 8 часот и 7 минути на станицата Пашажирски. Не му било првпат да дојде во Киев. Како потпретседател во мандатот на Барак Обама, Бајден беше главен осмислувач на превратот на власта во Украина во 2014 година.
– Мило ми е што повторно сум тука – рекол Бајден.
Во понеделникот советникот за национална безбедност на Белата куќа, Џејк Саливан, потврди дека непосредно пред посетата на американскиот претседател Џо Бајден на Украина, САД стапиле во контакт со Русија.
– Ја известивме Русија дека претседателот Бајден ќе замине во Киев неколку часа пред заминувањето за да се избегне конфликтна ситуација – изјави Саливан и додаде дека посетата на американскиот челник на украинската престолнина била испланирана „до најситни детали“.
По неговата посета, Бајден се врати во возот за патување во Пржемишл. Откако стигнал таму, тргнал кон Варшава.
Денеска светот го очекува неговото обраќање од Варшава, кое треба да го засени говорот на Владимир Путин во Москва утринава кој одекна низ светот, а во кој Путин ги обвини Западот и Украина дека ја почнале војната и дека нема да се исперат за срамот.
