Американскиот претседател Џозеф Бајден денеска во Белата куќа ќе се сретне со лидерите на Европската унија, на кои ќе им го пренесе уверувањето дека САД ќе останат посветени на поддршката на Украина и покрај тешкотиите на неговата администрација да го протурка законот за финансиска помош преку Конгресот. .
Освен што ќе разговараат за војната во Украина и конфликтот меѓу Израел и Хамас, лидерите на САД и ЕУ треба да се договорат како да се справат со климатските промени, економската конкуренција со Кина, а ќе разговараат и за трговските и даночните прашања.
Еден ден пред средбата со Бајден, претседателот на Европскиот совет, Шарл Мишел, изрази оптимизам дека американскиот претседател може да ги исполни своите ветувања за помош во вооружувањето на Украина.
Претседателката на Европската комисија, Урсула фон дер Лајен, во четвртокот изјави дека главна тема на разговор во „Овалната соба“ на кабинетот на Бајден ќе бидат Украина и Израел.
Земјите од ЕУ и дадоа на Украина близу 90 милијарди долари помош досега, вклучително и 27 милијарди долари воена помош, рече Фон дер Лејен.
Но, постојат сомнежи дали САД ќе се држат до своите ветувања.
Досега, САД обезбедија четири рунди помош за Украина во вкупна вредност од 113 милијарди долари, сума што вклучува замена на американската воена опрема испратена во Киев.
Бајден најави дека денеска од пратениците ќе побара дополнителни средства, околу 100 милијарди долари наменети за Украина и Израел.
Меѓутоа, неколку републиканци во Претставничкиот дом се сомневаат во вредноста на помошта за Украина што ја побара Бајден.
