Американскиот претседател Џо Бајден ги посочи неговиот претходник Доналд Трамп и лично неговите републикански поддржувачи како екстремисти кои се закана за Уставот на САД и кои имаат намера, како што рече, да ја уништат американската демократија.
-Постојат опасности што не можеме да дозволиме да надвладеат.Нацијата е на пресвртница и Американците треба да извикнат, ова не сме ние- рече Бајден, обвинувајќи ги Трамп и неговите поддржувачи дека сакаат да употребат насилство за да ги нападнат демократските институции.
МАГА републиканците (кратенката од предизборниот слоган на Трамп „Make America Great Again“ или „Направи ја Америка повторно голема“) се обидуваат да го соборат сегашниот систем.
-Не е можно да се поддржува бунт и да се биде проамерикански. Запрете го нападот врз американската демократија – рече Бајден, споредувајќи го Трамп со автократите во историјата кои, како што рече, ги поткопаа демократиите, пренесува Гласот на Америка.
Американскиот претседател, исто така, изјави дека многу републиканци не го поддржуваат Трамп, но дека со Републиканската партија „доминираат, е водена и заплашувана од Доналд Трамп и републиканците од МАГА“.
– Сакам да бидам многу јасен, не секој републиканец е МАГА републиканец. Не секој републиканец ја прифаќа нивната екстремна идеологија. Ова го знам бидејќи имав можност да работам со нив. Верувам дека моја должност е да ви ја кажам вистината без разлика колку е тешко и болно. Според мене, ќе кажам што е точно: МАГА републиканците не го почитуваат Уставот, не веруваат во владеење на правото. Тие не ја признаваат волјата на народот и одбија да ги признаат резултатите од слободните избори, рече меѓу другото Бајден за време на говорот во Филаделфија пред Домот на независноста.
Американскиот претседател нагласи дека „до последен здив ќе се бори за демократија“ и ги повика американските граѓани да му се придружат и да гласаат на претстојните избори.
