Австралиската полиција, ја идентификува жената чие тело минатата година беше пронајдено заѕидано во бетонски ѕид во подрумот на станбениот комплекс Алдерли во предградие на Бризбејн. Истрагата, утврдила дека жената била убиена пред повеќе од една деценија. Тања Ли Гловер, родена во 1971 година, имала оштетен вид и слух и имала приближно 38 години во моментот на нејзината смрт, соопшти денеска полицијата во Квинсленд.
Телото на Ли Гловер било откриено минатиот декември кога чистачите пронашле неидентификувани човечки останки зад бетонски ѕид во подрумот на станбен комплекс во Алдерли. Нејзиното тело било делумно закопано во ѕидот и било цврсто завиткано во облека и постелнина, објавија австралиските медиуми.
-На властите им требаа осум месеци за да го потврдат идентитетот на жртвата користејќи ДНК анализа и национални бази на податоци – рече детективот Ендрју Масингем, додавајќи дека нејзината смрт се третира како можно убиство.
Засега нема многу информации за животот на Тања Ли Гловер, која живеела прилично повлечено. Таа била толку изолирана од општеството што никој не ја ни пријавил за исчезната.
-Во овој момент не знаеме дали била вработена. Според првичните информации, таа била многу повлечена личност и водела многу мирен живот – изјави Масингем.
Откако полицијата ја идентификувала жртвата, стапила во контакт со нејзиното семејство и открила дека Гловер го прекинала контактот со родителите и тие верувале дека таа се преселила во друг град во Австралија. Масингем наведува дека се работи за необичен случај и дека допрва треба да се утврди мотивот за нападот, односно зошто некој би убил ранлива, повлечена жена, а потоа на ваков бесчувствителен начин би се ослободил од телото.
На фотографијата објавена од полицијата се гледа Ли Гловер како насмеана жена со црна коса до рамениците и очила.
Гловер се преселила во Квинсленд од Нов Јужен Велс во 2006 година и до 2010 година живеела во областа Фортитуд Валеј.
