Астероид со големина на автобус, кој научниците го забележаа пред само два дена, денеска ќе помине покрај Земјата.
Астероидот ќе помине блиску до Земјата, односно ќе му се приближи за време на летот на само 90.000 километри, што е околу 23 отсто од просечното растојание помеѓу Земјата и Месечината.
Многу поважен од тоа е фактот што пред само неколку дена никој не ни знаеше дека доаѓа овој астероид.
Се очекува дека астероидот наречен „2022 NF“ сигурно ќе помине покрај нашата планета и нема да падне на Земјата, соопшти лабораторијата за млазен погон на НАСА во Пасадена.
Астрономите го открија астероидот користејќи податоци од Pan-STARS, систем на камери и телескопи со седиште на Хаваи, чија примарна цел е откривање објекти блиску до Земјата.
Научниците го идентификуваа објектот дури на 4 јули и ја пресметаа неговата приближна големина и траекторија, проценувајќи дека вселенската карпа е широка помеѓу 5,5 и 12,5 метри.
Поради својата мала големина, „2022 NF“ не ги исполнува критериумите на НАСА за „потенцијално опасен астероид“, кој мора да биде долг најмалку 140 метри и да помине на 7,5 милиони километри од Земјата за да ги исполни тие критериуми.
НАСА и другите вселенски агенции внимателно следат илјадници објекти блиску до Земјата.
Овие објекти ретко претставуваат закана, но некои големи астероиди би можеле да се покажат опасни доколку се сменат нивните траектории.
