Агенцијата за бегалци при ОН денеска соопшти дека ситуацијата во Украина забрзано се влошува и ги повика соседните земји да ги отворат границите за прием на бегалци.
– Веќе видовме извештаи за жртви и луѓе кои почнаа да ги напуштаат своите домови за да одат на безбедно место – изјави високиот комесар на ОН за бегалци Филипо Гранди.
Тој рече дека УНХЦР ги интензивирала своите операции и дека работи со украинските власти за да обезбеди поголема хуманитарна помош.
Денеска до 13 часот Русија извршила повеќе од 30 напади врз цивилната и воената инфраструктура во Украина, се наведува во извештајот на Генералштабот на украинската армија.
„Вооружените сили на агресорот извршија повеќе од 30 напади со крстосувачки ракети ‘калибер’, а извршија и повеќе ракетни напади. Во нападите учествуваа авијацијата и артилеријата, чија цел беше цивилната и воената инфраструктура во Украина“, соопшти Генералштабот.
Се додава дека „непријателот ја продолжува офанзивата од воздух, како и дека ја преминал украинската граница во правците Аријанск-Херсон, Чаплинка-Каховка“.
Според украинскиот Генералштаб, забележена е засилена активност на диверзантско-извидувачки групи во оперативната област Бесарабија и во Црноморската оперативна зона на Украина.
Поголем дел од Здружените украински сили се преминати на одбранбени операции.
Оперативно-тактичките групи водат одбранбени борби во сите правци во кои непријателот напредува, се додава во соопштението на Генералштабот на украинската армија во Киев.
