Со проценета вредност од 299,28 милијарди долари (273,49 милијарди евра), Амазон ја носи тиулата најголем бренд во светот во 2023 година, и покрај тоа што бележи пад од 51 милијарда долари во изминатата година.
Во студијата објавена од порталот за финансиска анализа TradingPedia, гигантот за е-трговија се искачи на рангирањето и ја симна од врвот минатогодишната топ компанија Епл, која изгуби 16% од својата вредност која сега изнесува 297,51 милијарди долари, пренесува Еуроњуз.
Гугл се најде на третото место, зголемувајќи ја својата вредност за речиси 18 милијарди долари од минатата година и достигна 231,38 милијарди долари.
САД се убедливо најзастапената земја во првите 20 на ранг листата, што сочинува половина од компаниите на листата со вкупна вредност од околу 1,5 трилиони долари. Најголемата неамериканска компанија е јужнокорејскиот технолошки гигант Самсунг, кој се наоѓа на 6 место со 99,66 милијарди долари.
Европа се појавува само двапати во првите 20, и во двата случаи благодарение на Германија: вредноста на Дојче Телеком од 62,93 милијарди долари ја стави на 11 место, додека компанијата Мерцедез-Бенц е 16-та со 58,8 милијарди долари.
Сепак, и покрај тоа што се во мал број во првите 20, европските земји и компании се во голема мера вклучени во пошироката студија на TradingPedia.
Само 30 од 195 земји имаат брендови на глобалната топ 500 листа, а речиси половина од нив (14) се европски.
Се чини дека многу малку земји можат да произведат големи брендови. Има само 20 нации со повеќе од три брендови во првите 500: САД, Јужна Кореја, Кина, Германија, Јапонија, Велика Британија, Саудиска Арабија, Индија, Франција, Канада, Италија, Шпанија, Шведска, Русија, ОАЕ, Австралија, Швајцарија, Сингапур, Бразил и Холандија.
САД и Кина се јасни фаворити на светската сцена, со 202 и 79 од топ 500 брендови. Кога се гледаат првите 100, повеќе од половина (53) се од САД, а 22 се од Кина.
Германија има 7 брендови во топ 100, по што следува Јапонија со 6, Јужна Кореја со 4 и Велика Британија со 3.
Кога се гледаат индустриите како целина, банкарството доминира кога се зема предвид бројот на брендови во секој сектор, според TradingPedia: околу 14,2% од сите брендови во првите 500 се компании за банкарски и финансиски услуги, додека 10% се во малопродажба.
Меѓутоа, кога се гледа вкупната вредност, технологијата и малопродажбата се на врвот, при што технолошките брендови претставуваат околу 13,4% од вкупната вредност на првите 500 компании и малопродажните брендови 13,2%.
