Американските пратеници утринава предложија закон со кој на владините службеници ќе им се забрани да ја користат кинеската апликација TikTok на владини уреди од национална безбедност, пишува Ројтерс.
Сенатот минатата недела гласаше за нацрт-законот предложен од републиканскиот сенатор Џош Хејли.
Според Ројтерс, оваа забрана ќе биде дел од предложената мерка за финансирање на операциите на американската влада, за која се очекува да се гласа оваа недела. Нацрт-законот и дава на Канцеларијата за управување и буџет на Белата куќа 60 дена „да развие стандарди и упатства за извршните агенции кои бараат отстранување“ на TikTok од уредите.
Предлогот доби поддршка од претседателката на Претставничкиот дом Ненси Пелоси и републиканскиот врвен претставник Кевин Мекарти минатата недела.
„ТикТок“ рече дека загриженоста на американските официјални лица главно се заснова на дезинформации.
Законот нема да влијае на повеќе од 100 милиони Американци кои користат TikTok на приватни уреди или уреди во сопственост на приватна компанија.
Многу американски институции, вклучително и Белата куќа и безбедносните и одбранбените институции, веќе воведоа забрани за користење на оваа апликација на уреди во сопственост на владата.
Во понеделникот, државните агенции во Луизијана и Западна Вирџинија ја забранија употребата на TikTok на владините уреди поради загриженоста дека Кина може да ја користи апликацијата за следење на Американците и цензурирање на содржината.
Околу 19 од 50 американски држави сега барем делумно го блокираа пристапот до TikTok на државните компјутери. Најголем дел од ограничувањата беа воведени во изминатите две недели.
