Поранешниот американски советник за национална безбедност Џон Болтон изјави дека со доаѓањето на Доналд Трамп на власт може да се обнови идејата за размена на територии меѓу Белград и Приштина.
За размена на територии многу се разговарало во претходниот мандат на Доналд Трамп, а Болтон за приштинскиот портал „Teve1“ вели дека идејата му ја презентирал поранешниот британски премиер Тони Блер.
– Идејата за територијална размена меѓу Косово и Србија прв ми ја предложи поранешниот премиер на Велика Британија, Тони Блер. Потоа разговарав за тоа со претседателот на Србија, Александар Вучиќ и со поранешниот претседател на Косово. Хашим Тачи смета дека оваа опција е во интерес на стабилноста на Балканот, да се најде решение за недовршените конфликти – изјави Болтон.
Американскиот советник за национална безбедност не ја исклучува можноста идејата за размена на територии да се врати на преговарачка маса.
– Мислам дека за време на вториот мандат на Доналд Трамп би можела да се оживее идејата за размена на територии. Но, за ова е потребна волја од Косово и Србија за да се придвижи напред кон подобра иднина. Според мене, овој договор нема да претставува ризик на другите земји во регионот бидејќи тоа би бил договор само меѓу Косово и Србија со согласност на двете страни.
Американскиот дипломат зборуваше и за геополитички промени, велејќи дека Русија претставува закана за регионот на Западен Балкан.
Тој додава дека идејата за размена на територии бара подготвеност и на Белград и на Приштина, но оти смета дека тоа е опасност и за другите земји во регионот.
– Не може да се очекува од САД сами да ги решат проблемите. Моето прашање е дали Косово и Србија се доволно решени да ги надминат своите проблеми – заклучи Болтон.
