Министерството за финансии на САД објави дека воведува санкции за две кинески компании кои произведуваат мотори и делови за беспилотни летала за кои Белата куќа вели дека и помогнале на Русија да ги развие борбените беспилотни летала со долг дострел што ги користи во војната во Украина.
САД претходно ја обвинија Кина дека обезбедува материјална поддршка на руската воена индустрија за да и помогне на војната на Кремљ против Украина.
Најновите санкции имаат за цел да ја казнат „директната активност“ меѓу Пекинг и Москва, според високи претставници на администрацијата на американскиот претседател Џозеф Бајден.
Беспилотното летало со долг дострел од руската серија Харпи, „дизајниран и произведен во Кина во соработка со руски одбранбени фирми, беше искористен за уништување на критичната инфраструктура и резултираше со масовни жртви“ за време на војната во Украина, изјави портпаролот на Стејт департментот Метју Милер.
Пекинг ги отфрла обвинувањата дека продава оружје на Украина и Русија, но ги брани трговските односи со Москва како нормални.
САД воведуваат санкции за компанијата Xiamen Limbach Aircraft Engine, која произведува мотори за беспилотни летала и Redlepus Vector Industry, која соработуваше со руско правно лице, кое веќе е под санкции, за да ја олесни испораката на беспилотни летала во Русија.
Администрацијата, исто така, објави санкции против Артјом Михајлович Јамшчиков, руски државјанин опишан како вистински сопственик на ТСК Вектор и рускиот ентитет ТД Вектор, и кој бил вклучен во олеснувањето на пратките, рекоа официјални лица.
