Службата за брза помош во Лондон денеска згрижи голем број лица со потешкотии со дишењето по истекување штетни гасови во центарот за водни спортови на Олимпискиот парк „Кралица Елизабета“.
Лондонската агенција за развој на наследството (LLDC), која управува со паркот, соопшти дека инцидентот се случил околу 10:00 часот по Гринич и дека непосредната област била блокирана и евакуирана. Луѓето се повикани да се држат настрана од областа.
„Испративме повеќе екипи на местото на настанот и лекуваме голем број пациенти“, соопштија од итната служба.
Не е објавена конечната бројка на хоспитализирани лица, единствено во медиумите се шпекулира дека околу 200 лица се евакуирани од паркот.
