Информацијата за обид на атентат врз косовскиот лидер Албин Курти за време на посетата на Скопје била спин, тврди Александар Николоски, потпретседател на ВМРО-ДПМНЕ.
– Кога беше во Скопје, излезе информација дека имало обид за атентат. Тоа е целосно неточна информација, МВР ја демантираше. Но, тоа е договорен спин помеѓу СДСМ и владата на Косово со цел дефокус од проблемите во Македонија и кревање на рејтингот на владата на Косово. Повторувам, ова е договорен спин кој за нивна несреќа беше брзо разобличен – изјави Николоски во емисијата „Заспиј ако можеш“ на телевизија Алфа.
Николоски гледа опседнатост на СДСМ да му се умилкува на Албин Курти.
– Вака интензивна комуникација немаат со ниту еден друг. Прво во Косово беа Маричиќ и Зачевиќ, потоа Пендаровски, па Курти дојде тука. И се ова се случува во рок од две и пол недели. Mислам дека со поблиска фамилија толку често не се гледаат – рече тој.
Познато е дека Албин Курти е близок до албанската опозиција во Македонија, чии лидери веќе и отворено зборуваат дека по изборите полесно би коалицирале со очекуваниот победник ВМРО-ДПМНЕ. Познавачите на приликите сметаат дека со ваквата интензивна комуникација, која се оввива под влијание на западни амбасади во Скопје, СДСМ сака да ја компромитира релацијата на Курти со албанската опозиција.
