Западот ја повика владата во Приштина да одржи нови избори во четири општини на северот на Косово со мнозинско српско население. Косовскиот премиер Албин Курти, пак, по разговорите со американските претставници на социјалната мрежа Твитер ја спомена можноста за избори.
Косовскиот премиер Албин Курти, по разговорите со неколку американски претставници, на Твитер објави можност за предвремени избори во општините на северот на Косово, каде мнозинското српско население не е задоволно што на изборите во април за градоначалници беа избрани етничките Албанци. Србите тогаш ги бојкотираа изборите.
„Секогаш е добро да се разговара со [сенаторот од Конектикат] Крис Марфи, [сенаторот од Небраска] Пит Рикетс и [сенаторот од Њу Хемпшир] Џин Шахин. Им се заблагодарив за нивната долгорочна поддршка за Косово“, напиша тој, додавајќи дека „насилниците мора да бидат отстранети од општинските згради и да се спроведе бриселскиот договор“. Според него, ова е начинот на деескалација на ситуацијата „до нови избори“.
Предвремените избори во четири општини во северно Косово беа спомнати и од Курти во претходниот твит, во кој рече дека разговарал со Џон Фајнер, заменик советник за национална безбедност во Белата куќа.
Во четвртокот, Германија, Франција и Европската унија, исто така, побараа од владата во Приштина да одржи нови избори во општините со мнозинско српско население на северот на Косово, објави високиот претставник на ЕУ за надворешна политика Жозеп Борел по состанокот со претседателите на Србија и Косово во Молдавија. Косовската претседателка Вјоса Османи изјави дека тоа ќе го сторат доколку Белград не ги охрабри Србите на бојкот.
Како што напиша Борел на Твитер, тие поставија три јасни барања. Покрај итно спроведување на локалните избори, тоа е и обезбедување учество на Србите на изборите и почеток на формирање заедница на српски општини во рамките на дијалогот под покровителство на ЕУ.
