Актерот Том Круз не присуствуваше на доделувањето на Оскарите коишто се одржаа во неделата во Лос Анџелес. Ваквиот потег изненади многумина, имајќи предвид дека неговиот филм „Топ ган: Маверик“ беше номиниран во неколку категории, а сега се пишува за причините за неговото отсуство.
Одлуката да ги пропушти Оскарите беше изненадување бидејќи филмот „Топ ган: Маверик“ беше номиниран во 6 категории, вклучувајќи ја и онаа за најдобар филм. Круз е главниот актер и продуцент на ова остварување, а се зборуваше дека му пречело тоа што не бил номиниран за најдобар главен актер.
Можеби и насетувал дека вечерта нема да биде победничка за акциониот хит, но затоа не го пропуштил ручекот во чест на сите номинирани пред неколку недели во Холивуд.
Извор сега рекол дека Том Круз всушност ги пропуштил Оскарите поради поранешната сопруга Никол Кидман. Таа на доделувањето пристигна во придружба на нејзиниот сопруг Кит Урбан.
„Том не беше таму бидејќи таа беше, а тој не сакаше да се сретне со неа“, порачал изворот.
Извори блиски до Круз рекле дека во неговата одлука нема ништо лично туку едноставно не можел да ги усогласи обврските со свеченоста во Лос Анџелес, но не ги коментирале наводите за избегнување на Кидман.
Поранешните сопружници се разведоа во 2001 година, по 12 години брак. Том го иницирал разводот, а се претпоставува дека причината е одбивањето на Кидман да пристапи на Скиентолошката црква во која тој е еден од главните имиња. Таа по веста за разводот рекла дека многу го сакала Круз и дека долго време ѝ требало да го преболи.
Никол и Том по разводот не се појавуваат на истите јавни настани, пишува „Дејли мејл“.
Поранешниот пар ја посвои ќерката Изабела и синот Конор кои не разговараат со нивната мајка, но се блиски со татко им. Причината е Скиентолошката црква на која припаѓаат.
Никол и Кит во бракот добија две ќерки.
