Моментално Државната комисија за спречување корупција (ДКСК) постапува по предметот за новоименуваниот директор на Агенцијата за национална безбедност, доколку во разумен рок не ги испитаат наводите, Обвинителството секако ќе оформи предмет и ќе ги провери, изјавија од ОЈО Скопје за МИА.
Антикорупциската комисија минатата недела отвори предмет за именувањето на Бојан Христовски за директор на АНБ, откако до нив пристигнала анонимна претставка дека тој наводно не ги исполнува условите да биде директор. Претседателката на Антикорупциска потврди дека е оформен предмет по таа претставка и веќе се постапува.
Именувањето на Бојан Христовски за директор на институцијата задолжена за безбедноста и контраразузнавањето предизвика бројни реакции во јавноста.
Од СДСМ денеска го повикаа Јавното обвинителство да отвори постапка и да се утврди одговорност за прекршувањето на законот.
„Христовски нема меѓународно признаен сертификат за познавање англиски јазик, туку се користел со фалсификуван документ, што претставува прекршување на законот и кривично дело кое повлекува одговорност. Го повикуваме Јавното обвинителство да отвори постапка соодветно на своите надлежности. Повикуваме на транспарентна исграта која точно и непристрасно ќе утврди кој го овозможил ова и кој е одговорен за скандалот“, се вели во соопштението од СДСМ.
Владата на седница на 16 октомври го разреши директорот на Агенцијата за национална безбедност Зарко Милошевски, а на негово место го именуваше Бојан Христовски.
