Толпа луѓе се собраа денеска во центарот на Техеран за да му оддадат последна почит на иранскиот претседател Ебрахим Раиси, кој загина во хеликоптерска несреќа во неделата. Врховниот водач ајатолахот Али Хамнеи ги водеше молитвите за време на прошталната церемонија за починатиот претседател и седум други, вклучувајќи го и министерот за надворешни работи Хосеин Амир-Абдолахиан, кој исто така загина во несреќата.
Врховната власт на Исламската Република се поклони пред осум ковчези покриени со иранското зелено-бело-црвено знаме поставени еден до друг на Универзитетот во Техеран.
Врховниот лидер беше опкружен од водечки шиитски свештеници, членови на владата, вклучително и привремениот претседател Мохамад Мокбер, и високи членови на војската и на Револуционерната гарда.
Присутни беа и политичкиот лидер на палестинското исламистичко движење Хамас, Исмаил Ханија и Наим Касем од либанскиот Хезболах.
Неколку странски земји како Русија, Турција и Ирак најавија дека ќе испратат претставници на погребот, но не и на ниво на шефови на држави.
Мавтајќи со ирански знамиња, десетици илјади Иранци се собраа во центарот на Техеран за да му оддадат последна почит на загинатиот ирански претседател.
Денешниот ден е прогласен за државен празник и жителите на Техеран добиваа пораки на нивните телефони во кои ги повикуваат „да дојдат на погребот на маченикот“.
Властите прогласија петдневна жалост низ целата земја, додека се подготвува процесот за смена на Раиси, кој претседаваше со Иран од 2021 година. Една од задачите на привремениот претседател Мохамад Мохбер (68) е подготовка на избори што ќе се одржат на 28 јуни.
Погребната церемонија, предвидена да трае до четврток, започна вчера во Табриз, град во северозапниот дел на земјата во близина на местото каде што се случи несреќата.
Раиси ќе биде погребан утре во Машхад, неговиот роден град.
Ултраконзервативецот Ебрахим Раиси важеше за еден од фаворитите за наследник на ајатолахот Али Хамнеи, кој има 85 години. Додека беше претседател се соочи со протестното движење во 2022 година, економска криза влошена од американските санкции и влошените тензии со Израел.
