Турската управа за управување со катастрофи и вонредни состојби (АФАД) објави дека по катастрофалниот земјотрес што на 6 февруари го погоди јужниот дел на Турција и пограничната област на северот на Сирија, регистрирани се бројни последователни потреси – дури и повеќе од 6.000 потреси со различен интензитет. .
Последниот земјотрес со јачина од 4,5 степени според Рихтеровата скала е регистриран на територијата на Турција денеска во 12 часот и 4 минути.
По земјотресот на 6 февруари, АФАД забележа земјотреси „на секои три до четири минути“, а околу 40 од нив беа со јачина од 5 степени, рече шефот на таа администрација во Анкара, Орхан Татар, наведувајќи дека земјината кора се поместила 7,3 метри во текот на земјотрес.
Неговите коментари од прес-конференцијата ги објави Турската радио и телевизија (ТРТ) на својот Твитер профил.
Татар процени дека може да се очекуваат дополнителни потреси на земјата и дека овие потреси дополнително ќе му наштетат на „трауматизираното локално население“.
Тој ги повика сонародниците во погодените области да се држат подалеку од оштетените згради што е можно повеќе, додавајќи дека властите ја проценуваат штетата на станбените згради и стратешката инфраструктура, вклучувајќи брани и тунели.
Според последните официјални податоци, досега се регистрирани над 46.000 жртви, од кои најмалку 40.642 се во Турција, а повеќе од 5.800 во Сирија.
Ниту Турција, ниту Сирија досега не објавија проценки за бројот на исчезнати лица.
Само на југот на Турција, околу 105.000 згради беа уништени или оштетени, а десетици илјади луѓе останаа без покрив над главата.
